Ramil Səfərovun tərcümə etdiyi kitab bu gün təqdim ediləcək

Macarıstanda ömürlük həbsdə olan azərbaycanlı zabit Ramil Səfərovun macar dilindən Azərbaycan dilinə tərcümə etdiyi “Qapı” romanının bu gün Gəncliyə Yardım Fondunda təqdimat mərasimi keçiriləcək. Bu barədə Fonddan Modern.az-a məlumat veriblər. Tədbir saat 15.00-da başlayacaq.

Qeyd edək ki, erməni hərbçisinin qətlində təqsirləndirilərək Macarıstanda ömürlük həbs cəzası almış Azərbaycan zabiti Ramil Səfərov tanınmış macar yazıçısı Maqda Sabonun “Qapı” romanını macarcadan Azərbaycan dilinə tərcümə edib. R.Səfərov bu işini 2009-cu ilin oktyabrında dünyasını dəyişmiş anası Nübar xanımın xatirəsinə ithaf edib. Əsərin əsas qəhrəmanları qadınlardır. Psixoloji melodram kimi qələmə alınmış romanda yazıçı tipik macar qadınının obrazını yaradıb. Əsərdə başı çox bəlalar çəkmiş, öz həyatı ilə risk edərək həmişə insanlara kömək etmiş saf, mərd bir qadın olan Emerencin İkinci Dünya müharibəsindən əvvəlki və sonrakı həyatı, onun şərəfli ölümü təsvir olunub.

R.Səfərov kitaba yazdığı ön sözdə macar və Azərbaycan xalqının həyat tərzində, mədəniyyətində, tarixində çox oxşarlıq olduğunu qeyd edib. R.Səfərov yazıb ki, Azərbaycanda macar xalqına münasibətin 2004-cü ildə erməni ordusunun zabiti ilə onun arasında baş vermiş hadisəyə və ona oxunan hökmə görə formalaşması onu ciddi narahat edir:

“Məhkəmənin hökmü kifayət qədər əsassız və ədalətsiz olsa da, bu, mənim macar xalqına hörmətimi qətiyyən dəyişməyib. Ümidvaram ki, mənim tərcümə etdiyim bu əsər xalqlarımızın bir-birini daha yaxından tanıması, dostluq əlaqələrimizin daha da genişləndirilməsi və möhkəmləndirilməsinə cüzi də olsa bir töhfə olacaq”.

Kitabın redaktoru, “AssA-İradə” xəbər agentliyinin və “AzerNews” qəzetinin rəhbəri, ərəb filologiyası üzrə fəlsəfə doktoru Fazil Güney (Abbasov) kitaba yazdığı ön sözdə bildirir ki, məhbəsdə olmasına baxmayaraq, ruhunun azadlığı və yenilməzliyi, intellektinin dərinliyi və əhatəliyi ilə macarların da böyük hörmətini qazanmış Ramil yaradıcı əməyi sayəsində ona qarşı söylənən qatil, başkəsən uydurmasını yerlə-yeksan edir.
Kitab “AssA-İradə” agentliyində yığılaraq redaktə edilib, nəşrə hazırlanıb və “Çıraq” nəşriyyatında çap olunub.

Qeyd edək ki, Maqda Sabo Macarıstanın tanınmış qadın yazıçılarındandır. O həm Macarıstanda, həm də digər ölkələrdə çoxsaylı mükafatlara layiq görülüb və əsərləri 43 ölkədə nəşr olunub.

Modern.az

Ünvan: Mirqasımov küç. 4/41 Bakı AZ1007, Azərbaycan

Tel / Fax : (+99412) 4410924

Tel: (+99412) 4378247

E-mail: office@azfreespeech.az

1905.az STUDIO