“Jurnalistlərə silah verilməlidir!”

Modern.az Rusiya mətbuatına istinadən bildirir ki, “Vahid Rusiya” Partiyasından seçilən deputat Boris Reznik təhlükəli araşdırmalar aparan jurnalistlərə silah verilməsi təklifi ilə çıxış edib. Reznik hesab edir ki, Rusiyada jurnalistlərin təhlükəsizliyi məsələsi çox pisdir. “Belə ki, burada jurnalistləri qaynar bölgələrdən olanlardan daha tez-tez öldürülür. Son 10 ildə 300 nəfər öldürülüb, bundan əlavə, bu peşənin sahiblərinə hücumlar təşkil edilir”.
Deputat təklif edir ki, jurnalistlərin araşdırdıqları hansısa yazını çap etməyə və ya tapdıqları faktı açıqlamağa qoymayan insanlardan qorunması üçün silah verilməlidir. “Araşdırmaçı jurnalistlərə heç kimi təəccübləndirməyən pnevmatik tapançalar deyil, həqiqi odlu silah vermək lazımdır. O cümlədən jurnalistləri silahdan istifadə etmək qaydalarını da öyrətmək lazımdır”. Azərbaycanda da jurnalistlər yazdıqları mövzulara uyğun hücumlara məruz qalır, hətta bəziləri də öldürülür. “Monitor” jurnalının baş redaktoru Elmar Hüseynovun öldürülməsi, “Azadlıq” qəzetinin əməkdaşı Aqil Xəlilin bıçaqlanması və s. buna misaldır. Bunu nəzərə alaraq ölkəmizdə təhlükəli araşdırmalar edən jurnalistlərə silah verilməsi mümkün ola bilərmi?

Mətbuat Şurasının sədri Əflatun Amaşov Modern.az-a açıqlamasında bunun münasib fikir olmadığını qeyd edib. “Azərbaycanda jurnalistlər üçün heç bir təhlükəli şərait yoxdur ki, onlar silah gəzdirsinlər. Eyni zamanda qanunvericilikdə də bu nəzərdə tutulmayıb. Ümumiyyətlə, jurnalistin silah gəzdirməsini absurd olan fikirlərdəndir. O ölkələrin jurnalistləri silah gəzdirə bilər ki, məsələn, Latın Amerikası ölkələrinin birində jurnalist narkobaronların izinə düşür və onların işini araşdırır, bu halda jurnalistin təhlükəsizliyi üçün silah gəzdirməsinə ehtiyac ola bilər. Amma bizdə buna ehtiyac yoxdur”.

Ünvan: Mirqasımov küç. 4/41 Bakı AZ1007, Azərbaycan

Tel / Fax : (+99412) 4410924

Tel: (+99412) 4378247

E-mail: [email protected]

1905.az STUDIO