Cənubi Qafqaz regionu Avropada sabitlik üçün vacibdir və ümid edirəm ki, Serbiya cari səfər zamanı Ermənistan-Azərbaycan, Dağlıq Qarabağ münaqişəsinin nizamlanması prosesinə öz töhfəsini verə biləcək.

Trend-in məlumatına görə, bunu ATƏT-in fəaliyyətdə olan sədri, Serbiya xarici işlər naziri İvitsa Daçiç azərbaycanlı həmkarı Elmar Məmmədyarovla danışıqlardan sonra keçirilən birifinqdə deyib.

Qeyd edək ki, İ.Daçiç ATƏT-in fəaliyyətdə olan sədri qismində Cənubi Qafqaz ölkələrinə səfərləri çərçivəsində Bakıda səfərdədir.

İ.Daçiçin sözlərinə görə, Dağlıq Qarabağ münaqişəsinin həlli məsələsində münaqişə tərəflərinin üzərinə də böyük məsuliyyət düşür: “Azərbaycan tərəfinin xahişi ilə Ermənistan hökuməti ilə görüşdə azərbaycanlı iki girovun tez bir zamanda geri qaytarılması məsələsini qaldıracağam”.

O həmçinin qeyd edib ki, Serbiya özü münaqişəyə görə çox əziyyət çəkib və Dağlıq Qarabağ münaqişəsinin ağır nəticələrini çox yaxşı başa düşür: “Serbiyə ölkələrin ərazi bütövlüyü məsələsinə də həssaslıqla yanaşır”.

ATƏT-in fəaliyytdə olan sədri əlavə edib ki, Dağlıq Qarabağ münaqişəsinin həlli yalnız sülh yolu ilə və siyasi iradə halında mümkündür: “Helsinki yekun aktının prinsiplərinə əməl etmək və ikili standartlardan uzaq durmaq lazımdır”.

E.Məmmədyarov isə bildirib ki, ölkələrin ərazi bütövlüyü prinsipi öz müqəddəratını təyinetmə prinsipindən daha vacibdir: “Münaqişə gec və ya tez nizamlanacaq. Müxtəlif məsələlər yaranacaq ki, onları həll etmək lazım olacaq və həmin vaxt bizim Serbiyanın təcrübəsinə ehtiyacımız olacaq”.

İ.Daçiç isə öz növbəsində qeyd edib ki, Serbiya müharibənin nəticələrinin aradan qaldırılması məsələlərində zəngin təcrübəyə malikdir: “Serbiya münaqişənin nizamlanmasında vasitəçi olmaq və gələcək məsələlərin həll edilməsi üçün hər cür səy göstərəcək”.