«Can Bakı» proqramının ikinci hissəsində «Şəhər reklamlarının yazılışında Azərbaycan dili necə qorunur?» sualına cavab axtardıq. Söz Azadlığı Fondu Azərbaycan dilinin qorunması ilə bağlı monitorinqlərə başlayıb. Fondun təmsilçisi Nəzirməmməd Quliyev «Can Bakı»nın suallarını cavabladı.

Monitorinqlərə başlamaq istəyinin təkcə reklamlarla bağlı olmadığını deyən N. Quliyev əsas hədəfin bütövlükdə Azərbaycan dilinin qorunmasına yönəldiyini bildirdi:

«Həm «Dövlət dili haqqında» 30 sentyabr 2002-ci ildə qəbul olunmuş Qanunun tələblərinə necə əməl olunması, həm də ümumiyyətlə Azərbaycan dilinin qorunması bizi narahat etdiyindən, Fondun kollektivi bu qərara gəldi ki, monitorinqlərə başlayaq».

HƏR YERDƏ «BEAUTY SALON» YAZILARI GÖZƏ DƏYİRDİ

İlk tədbir kimi küçə reklamlarından başladıqlarını söyləyən həmsöhbətimiz Bakının 10 küçə və prospektində araşdırmalar apardıqlarını dilə gətirdi: «Azadlıq prospekti boyu «Boçka», «Başmaçok», «Çudo peçka», İstiqlaliyyət küçəsində «Tetradka», Rəşid Behbudov küçəsində «Bon Appetit», Səməd Vurğun küçəsində «Merkez Lehmacun», «İncegöl» kimi adlarla qarşılaşdıq. Bir də, hər yerdə «Beauty salon» yazıları gözə dəyirdi.

Saytımıza gələn suallara da toxunan N.Quliyev cavab olaraq «Dövlət dili haqqında» Qanunun 7-ci maddəsini misal gətirdi: «Azərbaycan Respublikasında bütün reklam və elanlarda dövlət dili işlənilir. Zəruri hallarda dövlət dili ilə yanaşı başqa dillər də istifadə oluna bilər. Lakin onların tutduğu sahə Azərbaycan dilinin tutduğu sahədən böyük olmamalı və Azərbaycan dilindəki yazıdan sonra gəlməlidir».

Fondun təmsilçisi vurğuladı ki, biz ingiliscə, rusca, başqa dillərdə yazılmasının əleyhinə deyilik, sadəcə olaraq bu qanunun şərtinin gözlənilmədiyini aşkarlamışıq.

N.Quliyev Bakı şəhər İcra Hakimiyyətinin Reklam Departamentinin monitorinqə etiraz etdiyini də bildirdi:

«Yaxşı bir araşdırma aparıb saytların biri. Reklam Departamenti də deyir ki, bizdə bədii şura bu işlərlə məşğuldur, amma bu barədə danışa bilmərik, gərək mətbuat xidməti icazə versin. Mətbuat xidməti də bədii şuradan xəbərsizmiş. İkinci tərəfdən, Reklamçılar Assosiasiyasının katibi Səyalı xanım deyir ki, bizə müraciət etməyiblər. Hərə bir qrant alıb iş görür. Niyə bizsiz keçirirlər?».

Qrantla deyil, daxili imkanları hesabına bu işi gördüklərini deyən həmsöhbətimiz işin mahiyyətinin deyil, xırda detallarının müzakirəyə çıxarıldığını bildirdi: «Bakıya gələn əcnəbi və ya əyalət insanı şəhəri görüncə hansı hislər keçirər, bura haradır?».

– Fond şəhərdəki mağazalarda, kafelərdə, digər xidmət sahələrində qəbzlərin, menyunun və xidmət göstərənlərin «dili» ilə bağlı da monitorinq keçirəcəkmi?
-90-cı illərdən bu yana Bakıda bu sahədə vəziyyət yaxşılaşıb, ya pisləşib?

– Bir dinləyicinin «Söz azadlığı pozulan bir ölkədə Söz Azadlığı Fondunun dil barədə monitorinq keçirməsi gülünc deyilmi?» sualı necə cavablandırıldı?