“Alma” qəzeti bu həftə köşklərə çıxacaq. Məlumatı “Media forum” saytına verən baş redaktor İsrail Musayev deyib ki, qəzetin növbəti sayı üçün xeyli yazı toplanıb: “Bu sayda “Dalğa”çı gənclərin yazılarını oxuya biləcəksiniz. Özüm də köşə yazısı ilə çıxış edəcəm”.

Baş redaktorun sözlərinə görə, bir neçə yazar əməkdaşlıq üçün müraciət eləsə də, onlarla söhbətdən razı qalmayıb: “Söhbət elədim, bir neçə mövzu dedilər, lakin razı qalmadım. Yenə də axtarışdayam. İstəyirəm ki, “Alma”nın əvvəlki ruhuna yaxın kollektiv toplaya bilim”.

Baş redaktor sabiq şef-redaktor Zahir Əzəmətlə yaxşı dil tapdığını, yaradıcılıq məsələlərində fikirlərinin üst-üstə düşdüyünü deyib: “Amma onlar qəzeti bu vəziyyətə salıb getdilər”.

Təxminən 10 gün əvvəl qəzetin şef-redaktoru Zahir Əzəmət, redaktor Elnur Aslanbəyli, jurnalistlər Natiq Muxtarlı, Günel Mövlud, habelə texniki heyət qəzetdən getdiklərini elan ediblər.

«Media forum»