Azərbaycanın xalq artisti, görkəmli bəstəkar, pedaqoq, alim Qara Qarayevin 92 illiyi münasibəti ilə silsilə tədbirlər keçiriləcək. Belə tədbirlərdən biri də fevralın 3-də Azərbaycan Musiqi Mədəniyyəti Dövlət Muzeyinin Klassik Musiqisevərlər Klubunun təşkilatçılığı ilə Niyazinin mənzil muzeyində baş tutacaq. Məlumat üçün bildirək ki, Azərbaycanın görkəmli bəstəkarlarından, professor Qara Qarayev 1918-ci ildə fevralın 5-də Bakı şəhərində anadan olub. O, 1926-ci ildən Azərbaycan Dövlət Konservatoriyası yanında musiqi məktəbinin şagirdi olub. Q.Qarayev 1935-ci ildə Azərbaycan Dövlət Konservatoriyasında bəstəkarlıq (professor L. Rudolf) və Azərbaycan xalq musiqisinin əsasları (professor Üzeyir Hacıbəyov) siniflərinin tələbəsi olub. 1958-ci ildə Azərbaycan SSR-nin xalq artisti adına layiq görülüb.