Martın 2-də - “Monitor” jurnalının baş redaktoru Elmar Hüseynovun qətlinin 4-cü ili tamamlanır. Həmin gün mərhum jurnalistin İkinci Fəxri xiyabandakı məzarı ziyarət olunacaq. Bunu “Media forum” saytına “Qanun” jurnalının baş redaktoru, Elmar Hüseynov Fondunun həmtəsisçisi Şahbaz Xuduoğlu deyib.

Aprelin 14-də Türkiyədə türkdilli ölkələrin jurnalist təşkilatlarının beynəlxalq forumu başlayacaq. SİA-nın məlumatına görə, forumda Azərbaycandan Mətbuat Şurasının sədri Əflatun Amaşovun rəhbərlik etdiyi 4 nəfərlik nümayəndə heyəti iştirak edəcək.

«Day.az» saytı ötən gün, ingilisdilli versiya «Today.az» isə fəaliyyətini bu gün bərpa edib. Mətbuatda gedən məlumatlara görə, saytın əvvəlki baş redaktoru Elnur Baimov portalın yeni təsisçisi ilə çalışmaqdan imtina edib. Yeri gəlmişkən, saytın bir QHT-yə satıldığı deyilsə də, təsisçinin adı hələlik açıqlanmır.

Fevralın 26-də səhər Təhlükəsizlik Polisinin əməkdaşları (xüsusi xidmət orqanı) «Vseti dnya» rusdilli qəzetin Tallin readksiyasına axtarış aparmaq üçün gəlib. Məlumatı yayan nəşrin saytı onların açıqlama verməkdən imtina etdiklərini yazır.

Moldova polisi Kişinyovdan 60 km aralıqda yerləşən Albasat TV kanalının stansiyasında axtarış keçirib. AFP-ın məlumatına görə, telekanalın nümayəndələri axtarışın ordersiz keçirildiyini iddia edirlər.

1859-ci ildən Kolorado ştatında nəşr olunan The Rocky Mountain News böhran şəraitində maliyyə problemləri ilə üzləşdiyindən bağlanacaq. Məlumatı fevralın 26-da AFP yayıb.

ABŞ Dövlət Departamenti dünyada insan haqlarının vəziyyətinə dair illik hesabat açıqlayıb. “Azadlıq” radiosunun məlumatına görə, hesabatın Azərbaycana aid hissəsində ölkədə insan haqlarının daha da pisləşdiyi vurğulanır.

Bu gün Azərbaycanda Xocalı faciəsinin qurbanlarını yad edirlər. Erməni silahlı birləşmələrinin vəhşiliyi nəticəsində 613 nəfər öldürülmüş, 487 nəfər əlil olmuş, 1275 dinc sakin isə erməni əsirliyinə düşərək əzab və işgəncələrə məruz qalmışlar.

«İnterfaks» Gürcüstanın «İmedi» teleşirkətinin RAK Georgia Holdinq gürcü-ərəb investisiya şirkətinə satılması haqqında xəbər yayıb. Səhmlərin 90%-i satdığını deyən «İmedi»nin keçmiş sahibi Cozef Key bunu «son aylar şirkətin çəkdiyi zərərin yerinə doldurmaq» istəyilə izah edib.

Ali Məhkəmənin sədri Ramiz Rzayev 12 saylı Cəzaçəkmə Müəssisəsində saxlanan “Gündəlik Azərbaycan” və “Realnı Azerbaydjan” qəzetlərinin baş redaktoru Eynulla Fətullayevə məktub göndərib. Məktubda jurnalistə Ali Məhkəməyə əlavə kassasiya şikayəti ilə müraciət etmək tövsiyə olunub. Məlumatı “Media forum” saytına baş redaktorun atası Emin Fətullayev deyib.

Associated Press çərşənbə günü, fevralın 25-də San-Fransiskonun ən iri və qocaman qəzetinin bağlanmaq təhlükəsi ilə üzləşdiyini xəbər verir. Hazırda həftəlik tirajı 340 min nüsxə olan San Francisco Chronicle qəzetinin naşiri xərcləri tənzimləməyə çalışır.

“Day.az” və “Today.az” layihələri satılıb. Bu barədə APA-ya layihələrin keçmiş baş redaktoru Elnur Baimov məlumat verib. Əvvəlcə saytlarda layihənin başa çatması barədə məlumat yerləşdirilsə də, daha sonra layihələrin fevralın 25-də fəaliyyətə başlayacağı barədə məlumat verilib.

Türkiyənin TRT telekanalı Kürd İctimai Demokratik Partiyanın lideri Əhməd Türkün parlamentdə kürd dilində çıxışını kəsib. Məlumatı CNN telekanalı yayıb.

Associated Press agentliyi bazar ertəsi iki Filadelfiya qəzetinin sahibinin müflislik proseduruna başladığını xəbər verib. AP qeyd edir ki, The Philadelphia Inquirer və Philadelphia Daily News qəzetlərini buraxan Philadelphia Newspapers şirkəti, son gündə ABŞ-da müflisliyə sənədləri təqdim edən ikinci media şirkətidir.

“Media FM” radiostansiyası öz ofisinin və verilişlərinin təqdimatını keçirib. “Media forum” saytı xəbər verir ki, ötən şənbə keçirilən təqdimatda “Media FM”in icraçı direktoru Tural Əliyev hazırda gördükləri işlərdən və gələcək planlarından danışıb.